AÐVENTA

eftir Gunnar Gunnarsson

í leikgerð og leikstjórn Öldu Arnardóttur

„Þegar hátíð fer í hönd, búa menn sig undir hana, hver á sína vísu.“

Þannig hefst saga Gunnars Gunnarssonar, Aðventa. Bókin kom út árið 1939 og er hún sú saga Gunnars sem víðast og oftast hefur verið gefin út. Hún kom fyrst út á dönsku, en síðar þýddi höfundurinn hana sjálfur á íslensku.
Hér er sagt frá svaðilförum vinnumannsins Benedikts sem fer til fjalla í vetraríki aðventunnar að leita þess fjár sem eftir varð er smalað var um haustið. Það er köllun hans að koma þessum eftirlegukindum til byggða fyrir hátíðirnar. Söguna byggir höfundur á frásögnum af frægum svaðilförum Benedikts Sigurjónssonar, öðru nafni Fjalla-Bensa, á Mývatnsöræfum og einkum þó eftirleitarferð sem hann fór í desember 1925. Þetta er klassísk saga um náungakærleika og fórnfýsi í vetrarhörkum íslenskra öræfa.

Í sýningunni er unnið eftir aðferðum frásagnarleikhússins þar sem einn leikari. Pétur Eggerz, stendur á sviðinu, flytur söguna og bregður sér jafnframt í hlutverk helstu persóna. Þá skipar hljóðmynd stóran sess í sýningunni og á þátt í að skapa heim sögunnar, en höfundur hljóðmyndarinnar er Kristján Guðjónsson sem hér vinnur sitt fyrsta verkefni með Möguleikhúsinu. Leikmynd og búninga hannar Messíana Tómasdóttir en Bjarni Ingvarsson annast lýsingu.

Sýningin er ætluð áhorfendum frá 13 ára aldri og tekur 60 mínútur í flutningi. Eins og aðrar sýningar Möguleikhússins er Aðventa ferðasýning og geta því skólar sem og aðrir fengið hana í heimsókn til sín.

Smellið hér til að lesa gagnrýni um sýninguna

Fyrir áhorfendur frá 13 ára aldri
Sýningartími: 60 mínútur
Undirbúningstími fyrir sýningu: 60 mínútur
Gólfpláss fyrir sýningu 5X5 m
Leikstjóri: Alda Arnardóttir
Leikmynd og búningar: Messíana Tómasdóttir
Tónlist og hljóðfæraleikur: Kristján Guðjónsson
Leikari: Pétur Eggerz